काठमाडाैं । जनता समाजवादी पार्टी (जसपा) विवादसम्बन्धी विषय निर्वाचन आयोगको इजलासमा हेर्दाहेर्दैमा राखिएको छ ।
प्रमुख निर्वाचन आयुक्त दिनेशकुमार थपलिया नेतृत्वकाे आइतबार बसेकाे इजलासले साे विषय हेर्दाहेर्दैमा राखेकाे हाे । आयाेगका प्रवक्ता राजेन्द्रकुमार श्रेष्ठका अनुसार इजलासले दुवै पक्षलाई आआफ्नो सक्कली कागजपत्र पेस गर्न आदेश दिएकाे छ । सक्कली प्रमाण झिकेपछि मात्रै अन्य कुरा अघि बढ्नेछ ।
जसपा विवादसम्बन्धी विषयमा साउन ६ गतेदेखि निरन्तर सुनुवाइ गर्ने निर्णय पनि इजलासले गरेकाे छ । इजलासमा निवेदक पक्षको कानुन व्यवसायी र जवाफ प्रस्तुतकर्ता पक्षले २ घण्टासम्म आआफ्ना तर्क राखेका थिए ।
जसपाको महन्थ ठाकुर पक्ष र उपेन्द्र यादव दुवै पक्षले आफूहरु नै आधिकारिक भएको दाबी गरेपछि जसपा विवाद आयाेगकाे इजलासमा पुगेकाे हाे । जसपा विवाद निरुपणका लागि आयाेगले असार २३ गते प्रमुख निर्वाचन आयुक्त दिनेश थपलियाकाे नेतृत्वमा ५ सदस्यीय इजलास गठन गरेकाे थियाे ।
