काठमाडौं । नेकपा एमालेकाे दशौं राष्ट्रिय महाधिवेशन आयोजक कमिटी बैठक आज बस्दैछ ।
एमाले प्रवक्ता प्रदीप ज्ञवालीका अनुसार आज बिहान ११ बस्ने बैठकले महाधिवेशन आयाेजक कमिटीलाई केन्द्रीय कमिटीमा रूपान्तरण गर्नेछ । याेसँगै एमाले औपचारिक रुपमै ०७५ जेठ २ काे अवस्थामा फर्कनेछ ।
मंगलबार बसेकाे एमाले स्थायी कमिटी बैठकले महाधिवेशन आयाेजक कमिटीलाई केन्द्रीय कमिटीमा रूपान्तरण गर्ने निर्णय गरेकाे थियाे । साे बैठकले असार १८ गते केन्द्रीय कमिटी बैठक बाेलाउने निर्णय समेत गरेकाे छ । असार १३ गते बसेकाे एमाले स्थायी कमिटी बैठकले असार १६ अर्थात आज आयोजक कमिटीको बैठक बोलाउने निर्णय गरेको थियाे ।
प्रधानमन्त्री एवं एमाले अध्यक्ष केपी शर्मा ओलीले गत जेठ २३ गते पार्टीलाई एकताबद्ध बनाउन ०७५ जेठ ३ गते अघिकै अवस्थामा फर्कने घाेषणा गर्दै पार्टी एकताका लागि ६ बुँदे प्रस्ताव अगाडि सार्नुभएकाे थियाे । अध्यक्ष ओलीले कांग्रेस सभापति शेरबहादुर देउवालाई प्रधानमन्त्री बनाउन गरिएकाे हस्ताक्षर फिर्ता लिन माधव गुटलाई आग्रह गर्नुभएकाे थियाे । हस्ताक्षर फिर्ता भए पार्टीले गरेका कारबाही फिर्ता गरिने र यसबीचका विवादका कारण कसैप्रति पूर्वाग्रह नराखिने अध्यक्ष ओलीको प्रस्ताव थियो ।
तर माधवकुमार नेपालहरुले हस्ताक्षर फिर्ता नलिने बताइसक्नु भएकाे छ । उहाँकाे गुटका धेरै नेता भने संस्थापन पक्षकाे प्रस्तावमा सहमत छन् ।
