पोखरा । कोरोना संक्रमणका कारण जारी निषेधाज्ञाले समस्यामा परेका व्यक्तिको गर्जो टार्ने लायन्स क्लब अफ अभियानद्वारा सुरु गरिएको ‘हुनेले दिएर जाऔँ, नहुनेले लिएर जाऔँ’ अभियानको सातौँ दिनसम्म एक हजार सय भन्दा बढीले सेवा लिएका छन् ।
विपी चोकस्थित चिप्लेढुंगामा सञ्चालन भइरहेको खाद्य बैंकमा चामल, दाल, तेल, नुन, चनालगायत सामग्री छन् । अहिलेको विषम परिस्थितिले खाद्य समस्यामा परेका व्यक्ति, अलपत्र बटुवालगायतलाई लक्षित गरी अभियान सुरु गरिएको अभियानका संस्थापक अध्यक्ष विनोद ढुंगानाले जानकारी दिनुभयो । 'हामीले जेठ १६ गतेदेखि अभियानमा सुरु गरेका हौँ, शनिबार सेवा बन्द रहन्छ, अहिलेसम्म एक हजार एक सय १५ जनाले सेवा लिनुभएको छ', उहाँले भन्नुभयो ।
उहाँका अनुसार क्लबले राहत कोषमार्फत संकलित रकमबाट सुरुमा २० हजार रुपैयाँबाट सो अभियान सुरु गरेको हो । अहिले लायन्स क्लबका सदस्य एवम् गैह्रसदस्यले स्वतस्फूर्त सहयोग गर्दै आएका छन् । हालसम्म करीब चार लाख रुपैयाँ भन्दा बढीको राहत सामग्री वितरण भइसकेको उहाँले जानकारी दिनुभयो ।
बिहान ६ः०० देखि ९ः०० बजेसम्म सञ्चालन गरिएको सो अभियानमा दैनिक एक सय ३० देखि माथि एक सय ६५ सम्म खाद्य सामग्री लिन आउने गरेको अभियान कार्यक्रमका संयोजक मातृका पोखरेल जानकारी दिनुभयो । 'हामीले नाम टिपाउँछौँ, सकेसम्म दिन दिनका लागि भनेर सामान लैजान भन्छौँ, उहाँहरुले आफ्नो परिवारको सदस्य संख्या र आवश्यक खाद्य सामग्री लिएर जाने गर्नुहुन्छ', उहाँले भन्नुभयो । त्यसरी आउने केही व्यक्ति दैनिक दोहोरिने गरेको उहाँको भनाइ छ । पोखरेलका अनुसार यो अभियानलाई निरन्तर रुपमा निषेधाज्ञा जारी रहेसम्म पुनः सञ्चालन गरिने छ ।
–रासस
