मार्तडी । बाजुरामा नयाँ भेरियन्टको कोरोना भाइरस संक्रमण बढ्न थालेपछि परीक्षणको दायरा बढाउनका लागि स्वास्थ्य सामग्रीसहित एन्टिजेन कीट सहयोग गरिएको छ । मानवीय सेवामा अनेकौँ प्रयास धनगढीले बुढीगंगा नगरपालिकालाई शुक्रबार स्वास्थ्य सामग्री र एक सय वटा एन्टिजेन कीट सहयोग गरेको नगरपालिकाले जनाएको छ ।
नगरपालिकामा कोरोना संक्रमितको संख्या बढ्दै गएको र एन्टिजेन कीट अभाव भए पनि समन्वय गरेर उक्त संस्थाले एक सय वटा एन्टिजेन कीट सहयोग गरेको नगरप्रमुख दीपकविक्रम शाहले बताउनुभएको छ । संस्थाका अध्यक्ष भक्तराज जोशीले नगरप्रमुख शाहलाई एक सय एन्टिजेन कीटसहित स्वास्थ्य सामग्री हस्तान्तरण गर्नुभयो । उक्त संस्थाले नगरपालिकालाई चार हजार थान सर्जिकल मास्क, ५० थान ग्लोब्स, १० लिटर स्यानिटाइजर, पिपिइ सेट दुई वटा हस्तान्तरण गरेको अध्यक्ष जोशीले राससलाई जानकारी दिनुभएको छ ।
उहाँले दिएको जानकारीअनुसार नगरपालिकाको माग गरेअनुसार संस्थाले स्वास्थ्य सामग्री र एन्टिजेन कीट सहयोग गरेको बताउनुभयो ।
एन्टिजेन किट सहयोगपछि नगरपालिकाको ७, ८ र ९ वडामा रहेका ४२ स्थानीयवासीको कोरोना परीक्षण गरिएको छ । उक्त वडामा रहेका स्थानीयवासीको एन्टिजेन प्रविधिबाट कोरोना परीक्षण गर्र्दा २० जनालाई संक्रमण देखिएको नगरप्रमुख शाहले बताउनुभयो ।
त्यसैगरी जिल्ला अस्पताल बाजुरालाई दुईवटा अक्सिजन सिपलण्डर सहयोग गरिएको छ । धनगढीमा व्यवसाय गर्दै आएका त्रिवेणी नगरपालिका–९ पैमाका राजेन्द्र खत्रीले आफ्नै लगानीमा दुईवटा अक्सिजन सिलिण्डर सहयोग गर्नुभएको हो ।
कोरोना भाइरसको संक्रमणबाट उपचाररत बिरामीले अक्सिजन नपाएर अकालमा ज्यान नगुमाउन भनेर सो सिलिण्डर सहयोग गरेको खत्रीले राससलाई बताउनुभयो । उहाँले जिल्ला अस्पताल बाजुरामा भेन्टिलेटर, आइसीयू स्थापनाका लागि ५१ हजार रुपैयाँ सहयोग गर्दै अभियानसमेत चलाउनुभएको छ ।
-रासस
