काठमाडौं । जनता समाजवादी पार्टीका अध्यक्ष महन्थ ठाकुरले नयाँ सरकार गठनमा जसपाको भर नपर्न कांग्रेस सभापति शेरबहादुर देउवालाई पुन ः सुझाव दिनुभएको छ ।
सरकार गठनको विषयमा जसपा तटस्त बस्ने निर्णय भएको ठाकुुरले देउवालाई सन्देश दिनुभएको छ । उहाँले यस अघिको भेटमा पनि देउवालाई भर नपर्न सुझाव दिनुभएको थियो ।
देउवा निवास बुढानिलकण्ठमा बिहीबार देउवा, ठाकुर र राजेन्द्र महतो बीच भेट भएको हो । ठाकुरले कांग्रेस गठबन्धनलाई समर्थन जनाउन नसक्ने निर्णय सुनाउनुभयो । राष्ट्रपतिलाई सरकार गठनको पक्षमा जसपा नरहेको भन्दै यसअघि नै ठाकुरले पत्र पठाईसक्नुु भएको छ ।
ठाकुर पक्षले सुरु देखिनै सरकार गठनमा तटस्थ रहेको भन्दै कांग्रेसलाई भर नपर्न आग्रह गरेका छ । तर, जसपाको उपेन्द्र यादव समूह भने सरकार गठनको पक्षमा रहेको छ । आफू पहिलो अध्यक्ष रहेको भन्दै यादवले गरेको निर्णय मान्य नहुने ठाकुरले राष्ट्रपतिलाई भनिसक्नुु भएको छ ।
जसपाको निर्णयसँगै नर्याँ सरकार गठन गर्न देउवालाई सकस हुने देखिएको छ । राष्ट्रपतिले नयाँ सरकार गठन गर्न दिएको समय आज राति नौ बजे सकिँदै छ ।
-आइएनए न्युज एजेन्सी
