काठमाडौं । ‘स्थायी कमिटीले कारबाही फुकुवा गरेको भन्ने कुरा आयो, यसलाई सकारात्मक मान्नुपर्छ’, तेह्रथुम निर्वाचन क्षेत्र नं १ बाट निर्वाचित नेकपा एमालेका प्रतिनिधि सभा सदस्य भवानीप्रसाद खापुङ भन्नुहुन्छ ।
एमालेको माधव गुटमा खुल्नु भएका सांसद् खापुङले बास्तवमा पार्टी मिलाउने गरी यो निर्णय गरिएको भए स्वागत योग्य भएको बताउनुभयो । ‘अन्तिम घडीमा जालझेल गर्ने गरी आएको भए अलग कुरा हो’, उहाँले भन्नुभयो ।
एमालेलाई एकतावद्ध बनाउन अदालतको फैसला अनुसार पार्टीलाई पहिलेको अवस्थामा फर्काउनु पर्छ भन्ने भए पनि कारबाही फुकुवाले त्यसको लागि बाटो खोल्न सक्ने उहाँको भनाइ छ ।
केही लागेन भने मात्र सांसद् पदबाट राजीनामा दिने कुरा भएको उहाँले बताउनुभयो । ‘त्यस्तै पर्यो भने राजीनामा दिने भन्ने कुरा हो, नेताहरु छलफल मै हुनुहुन्छ, त्यसले के निर्णय गर्छ त्यही अनुसार हुन्छ’, खापुङले भन्नुभयो ।
उहाँले पार्टी एकताको पक्षमा कसैको पनि विमति नभएको बताउनुभयो । तर सबैको आत्मासम्मानको कुरामा ध्यान दिनुपर्ने उहाँको भनाइ छ ।
-आइएनए न्युज एजेन्सी
