नयाँ दिल्ली । भारतमा कारोनाभाइरसबाट संक्रमित भएकाहरुको दैनिक संख्या दिन प्रतिदिन बृद्धि हुँदै गएको छ ।
तिब्र गतिमा फैलिएको कोरोनाभाइरसबाट एकै दिनमा तीन लाख ८६ हजार चार सय ५२ जना संक्रमित भएका छन् ।
कोरोनाभाइरसको महामारी फैलिएदेखि यता गत २४ घण्टामा हालसम्मकै सबैभन्दा धेरै संक्रमित भएको अधिकारीहरुले जनाएका छन् ।
केन्द्रीय स्वास्थ्य तथा परिवार कल्याण मन्त्रालयलका अनुसार सोही अवधिमा तीन हजार चार सय ९८ जनाको कोरोनाका कारण ज्यान गएकाे छ ।
दैनिक रुपमा संक्रमणमुक्त हुनेहरुको संख्या पनि बढीरहेको पाइएको छ । पछिल्लो २४ घण्टामा दुई लाख ९७ हजार चार सय ५० जना संक्रमणमुक्त भएको मन्त्रालयले जनाएको छ । देशभरी कुल संक्रमित मध्ये अहिलेसम्म कुल एक करोड ५३ लाख ८४ हजार चार सय १८ जना संक्रमणमुक्त भएका छन् ।
भारतमा अहिलेसम्म कुल एक करोड ८७ लाख ६२ हजार नाै सय ७६ जना कोरोनाभाइरसबाट संक्रमित भएका छन् । ती मध्ये ३१ लाख ७० हजार दुई सय २८ जना अझै पनि संक्रमित अवस्थामै रहेको मन्त्रालयको तथ्यांक छ ।
भारतको स्वास्थ्य अनुसन्धान परिषदका अनुसार अप्रिल २९ तारिखसम्म देशभरी कुल २८ करोड ६३ लाख ९२ हजार ८६ ओटा स्वाब परीक्षण गरिएको छ । ती मध्ये पछिल्लो २४ घण्टामा १९ लाख २० हजार एक सय सात जनाको कोरोना परीक्षण गरिएको अधिकारीहरुले जनाएका छन् ।
भारतमा एकातर्फ महामारी फैलिइरहेको छ भने अर्को तर्फ कोरोनाभाइरस विरुद्धको खोप लगाउने क्रम पनि चलिरहेको छ । सरकारी अधिकारीहरुका अनुसार अहिलेसम्म १५ करोड २२ लाख ४५ हजार एक सय ७९ मात्रा खोप खपत भएको छ ।
–रासस
