काठमाडौं । तत्कालै सरकार त्याग्न माओवादी केन्द्रका अध्यक्ष पुष्पकमल दाहाल प्रचण्डलाई एमाले नेता माधवकुमार नेपालले दवाब दिनुभएको छ ।
व्यापारी तथा ठेकेदार टपेन्द्र कार्कीको घरमा प्रचण्ड र माधवको आज बिहान भेट भएको हो । माधव निकट एक नेताले दिएको जानकारी अनुसार तत्कालै सरकार छाड्न र प्रधानमन्त्री केपी शर्मा ओलीलाई विश्वासको मत लिन वाध्य पार्न माधवले दवाब दिनुभएको हो ।
आफ्नो गुटभित्र तिब्र विवाद उत्पन्न भएपछि आपतविपतमा पर्नुभएका एमाले नेता माधवले माओवादीले सरकार त्योगमा केपी ओली दवाबमा पर्ने र एमालेभित्र आफूहरुलाई सजिलो हुने भन्नुभएको छ । माधव निकट नेताको भनाई छ– ‘ओली सरकार ढाल्न जति ढिलाई हुन्छ, ओलीलाई विश्वासको मत लिन वाध्य पार्ने काम जति पर धकेलिन्छ, ओली त्यति बलियो हुन्छन् भन्ने माधव कमरेडको भनाई छ ।’
माधव गुटभित्र एमालेमै बस्ने कि प्रचण्डको पार्टीतिर लाग्ने भन्ने चर्काे विवाद भइरहेको छ । आज बस्ने संसदीय दलको बैठकमा सांसद्हरुलाई जानबाट रोक्ने प्रयास पनि जारी रहेको छ । प्रचण्डले ‘स्टेप’ नचाल्ने हो भने आफ्नो साथमा रहेका सांसद्हरु भटाभट एमालेमा जाने माधवको भनाई रहेको बुझिन्छ ।
‘माओवादी केन्द्रले सरकार छाड्नुपर्यो, यही भन्न माधवले भेट्नुभएको हो’– माधव निकट नेताहरुको भनाई छ ।
आफ्नो पक्षका ठूलो संख्याका सांसद्हरुले एमाले नछाड्ने भन्न थालेपछि माधव नेपाल समस्यामा पर्दै आउनुभएको छ ।
