काठमाडौं । आज शान्ति प्रक्रियाका सुत्रधार मध्येका एक गिरिजाप्रसाद कोइरालाको ११ औं स्मृति दिवस । उहाँको सम्झनामा जीपी कोइराला फाउण्डेसनले स्मृति दिवस मनाउँदै छ ।
नेपाली कांग्रेसका तत्कालीन सभापति कोइरालाले माओवादीलाई शान्ति प्रक्रियामा ल्याउन उल्लेख्य भूमिका खेल्नु भएको थियो । २०६२⁄०६३ को सफल जनआन्दोलन पछि सरकारको तर्फबाट वृहत शान्ति सम्झौतामा हस्ताक्षर गरी उहाँले माओवादीलाई शान्ति प्रक्रियामा ल्याउनुभएको थियो ।
नेपालमा गणतन्त्र स्थापनमा पनि कोइरालाको महत्वपूर्ण योगदान रहेको छ । स्वर्गीय कोइराला पटक पटक नेपालको प्रधानमन्त्री समेत हुनुभयो ।
विराटनगर जुटमिलको मजदुर आन्दोलनबाट उहाँले राजनीति सुरु गर्नुभएको थियो । उहाँ तीन कार्यकाल नेपाली कांग्रेसको सभापति हुनुभयो ।
कोइरालाको २०६६ साल चैत ७ गते छोरी सुजाता कोइरालाको मण्डिखटार स्थित घरमा निधन भएको थियो । कोइरालाको भारतको बिहार राज्यको सहरसा जिल्लाको टेडी गाउँमा वि.सं. १९८१ असार १८ गते जन्म भएको थियो । उहाँको परिवार भारतमा निर्वासित जीवन बिताइरहेको बेला कृष्णप्रसाद कोइराला तथा दिव्या कोइरालाका कान्छो छोराको रुपमा गिरिजाप्रसाद कोइरालाको जन्म भएको थियो ।
