‘बैंक ब्यालेन्स’ देखाउने बहानामा ६० लाख ठगी
काठमाडौं । अमेरिका पठाउने बहानामा ६० लाख ठग्ने दुईजनालाई प्रहरीले पक्राउ गरेको छ । पक्राउ पर्नेहरुमा बाग्लुङका ३४ वर्षीय रामचन्द्र कुँवर र काभ्रेका ३४ वर्षीय गणेश लामा रहेको महानगरीय अपराध महाशाखामा एसएसपी सहकुल थापाले जानकारी दिए ।
ललितपुरको इमाडोल बस्ने उनीहरुले नुवाकोटकी महिलालाई अमेरिका पठाउनको लागि पर्याप्त बैंक ब्यालेन्स देखाउनुपर्ने भन्दै आफ्नो खातामा ६० लाख जम्मा गर्न आग्रह गरेका थिए ।
भिसा प्रोसेसिङका लागि बैंक ब्यालेन्स देखाउनु पर्ने भनिएकाले ती महिलाले पनि खाता पैसा जम्मा गरिन् ।
खातामा पैसा आएपछि नै रामचन्द्र र गणेश ती महिलाकाे सम्पर्कमा आएनन् । उनीहरुले बैंकका विभिन्न शाखाबाट नक्कली कागजपत्र र नक्कली सवारी चालक अनुमति पत्र प्रयाेग गर्दै ती महिलाले जम्मा गरेकाे पैसा निकालिसकेका छन् ।
महाशाखाबाट खटेको टोलीले उनीहरुलाई आइतबार भक्तपुर ठिमीबाट पक्राउ गरेको हो । प्रहरीको प्रारम्भिक अनुसन्धानबाट उनीहरुले अन्य तीनजनालाई समेत ७० लाख ठगी गरेको खुलेको छ ।
प्रतिकृया दिनुहोस