रामेछाप । रामेछापको गोकुलगंगा गाउँपालिका–६ फर्पुको सिमलडाँडा भिरमा फोर्स जिप दुर्घटनामा परि ज्यान गुमाएका पाँचै जनाको पहिचान खुलेको छ ।  

शुक्रबार दिउँसो काठमाडौंबाट रामेछापको रस्नालु तर्फ जाँदै गरेको ना १ ज ७१२३ फोर्स गाडी दुर्घटना हुँदा पाँच जनाको ज्यान गएको थियो । 

जिल्ला प्रहरी कार्यालय रामेछापका अनुसार दुर्घटनामा अन्य तीन जना घाइते भएका छन् । घाइतेलाई थप उपचारको लागि काठमाडौं पठाइएको छ । 

दुर्घटनामा परी रामेछापको गोकुलगंगा गाउँपालिका–४ का वडाध्यक्ष रामचन्द्र बस्नेतको ज्यान गएको छ । त्यस्तै गोकुलगंगा–५ की ३० वर्षीया कविता कार्की खड्का, उहाँकी छोरी सात वर्षीया स्वस्तिका खड्का र गोकुलगंग–४ की साबिना बिक गजमेरको पनि दुर्घटनामा ज्यान गएको छ । दुर्घटनामा परि गाडी चालक रामेछापको मन्थली नगरपालिका–९ पुरानागाउँ फोस्रे घर भएका ३५ वर्षीय हिराबहादुर कार्कीको समेत ज्यान गएको छ । 

दुर्घटना कास्कीको लेखनाथ नगरपालिका ४२ वर्षीय केशव शर्मा, रामेछापको गोकुलगंगा–४ बेतालीकी २७ वर्षीय सरस्वती कार्की र  मृतक सबिनाका छोरा ४ वर्षीय सवीन बिक घाइते भएका छन्  । घाइते मध्य बालिकाको अवस्था गम्भीर छ । 

दुर्घटनाको कारण खुल्न सकेको छैन । गाडी सडकबाट ३ सय मिटर जति तल खरेको छ ।