काठमाडौं । प्रधानमन्त्री केपी शर्मा ओलीले भ्रष्टाचार नियन्त्रणका लागि केवल कानुनी व्यवस्था र कार्यान्वयन पर्याप्त नहुने बताउँदै आदर्श शिक्षाको आवश्यकता औंल्याउनुभएको छ।

शुक्रबार काठमाडौंमा आयोजित ‘डिजिटल नेपाल कन्क्लेभ संवाद’ कार्यक्रमको उद्घाटन गर्दै प्रधानमन्त्री ओलीले मानिसको चरित्र, आचरण र सोचमा परिवर्तन ल्याउनुपर्नेमा जोड दिनुभयो।

प्रधानमन्त्री ओलीले भन्नुभयो, "भ्रष्टाचारलाई हामी शून्यमा पुर्‍याउन सक्छौं, तर यो केवल 'ल इम्प्लिमेन्टेसन' र 'ल इन्फोर्समेन्ट' बाट सम्भव हुँदैन। मानिसले आफैँभित्रबाट ‘म गलत गर्दिन’ भन्ने सोच विकास गरे मात्र यो समस्याको समाधान सम्भव छ।"

उहाँले कानुनको भूमिकालाई अस्वीकार नगरे पनि केवल कानुनी कारबाहीको भरमा भ्रष्टाचार नियन्त्रण गर्न कठिन हुने तर्क गर्नुभयो। "कानुनले पत्ता लगाएर कारबाही गर्छ भने पनि पत्ता लगाउन गाह्रो हुन्छ। भ्रष्टाचारको अन्त्य कानुनले मात्र होइन, समाजमा नैतिक शिक्षा र मूल्यका आधारमा सम्भव हुन्छ," उहाँले स्पष्ट पार्नुभयो।

प्रधानमन्त्री ओलीले मोडल एजुकेशन (आदर्श शिक्षा) लाई भ्रष्टाचार नियन्त्रणको मुख्य माध्यमका रूपमा प्रस्तुत गर्दै शिक्षा प्रणालीमा सुधार आवश्यक रहेको औंल्याउनुभयो।

कार्यक्रममा उहाँले डिजिटल नेपाल अभियानको प्रभावकारी कार्यान्वयनका लागि पारदर्शिता, उत्तरदायित्व र नागरिक सचेतनालाई पनि महत्वपूर्ण तत्वका रूपमा उल्लेख गर्नुभयो।