काठमाडौं । पोखराका ११ वटा वडा कार्यालयमा शृंखलाबद्ध चोरी गर्दै आएका किशोर थापालाई प्रहरीले पक्राउ गरेको छ ।

काठमाडौं महानगरपालिका–११ घर भएका थापाले पोखराको कालिका चोकमा डेरा लिएर चोरी गर्दै आएका थिए । 

किशाेरले सरकारी कार्यालय फोडेर त्यहाँको नगद, ल्यापटप, क्यामेरा र कम्युटर चोरी गरेर थापाले सो सामान कलंकीमा रहेको कम्प्युटर सोलुसनमा बिक्री गर्दै आएका थिए । 

काठमाडौं प्रहरीसँगको समन्वयमा जिल्ला प्रहरी कार्यालय कास्कीले कम्युटर सोलुसन प्रालिका सञ्चालक रुपचन्द्र गोपालीलाई पनि पक्रेको छ ।

आइतबार पोखरा महानगरपलिका–६ बाट पक्राउ परेका ५१ वर्षीय किशोर थापाको कोठाबाट प्रहरीले ल्यापटप, क्यामेरा, चोरीमा प्रयोग गरिने औजार र २ दशमलव ३६ ग्राम लागुऔषध ब्राउन सुगर बरामद गरेको जिल्ला प्रहरी कार्यालय कास्कीले जनाएको छ । 

पोखरामा चोरी गरेर थापा सार्वजनिक गाडीमा सामान बेच्न कलंकी आउने गरेको र उनि यसअघि पनि चोरी मुद्दामा जेल सजाय पाएर छुटेको अनुसन्धानबाट खुलेको छ । 

पक्राउ परेका थापा र गोपालीबारे थप अनुसन्धान भइरहेको कास्की प्रहरीले जनाएको छ ।