काठमाडौं । कर्णालीको वीरेन्द्रनगर नगरपालिकाले कोभिड नियन्त्रण तथा रोकथामको लागि कोभिड संक्रमितको पहिचान अभियान सुरु गरेको छ ।

नगरपालिकामा संक्रमण नियन्त्रणमा नआएपछि संक्रमितको पहिचान गरी रोग नियन्त्रण गर्ने अभियान सुरु गर्न लागिएको हो । यसका लागि नगरपालिकाका वडा वडामा पीसीआर परीक्षणको लागि स्वाब संकलनको काम सुरु गरिएको नगरपालिका उपप्रमुख मोहनमाया ढकालले जानकारी दिनुभयो ।

ढकालका अनुसार मंगलबारदेखि सुरु भएको अभियान आइतबारसम्म चल्ने छ । उहाँका अनुसार मंगलबार र बुधबार वडा नं ३, ७ र १३ तथा नगरपालिकामा स्वाब संकलन गरिएको छ । त्यस्तै आज वडा नं ४ र ५ मा स्वाब संकलनको काम भइरहेको छ ।

शुक्रबार वडा नं १४ र नगरपालिकामा, शनिबार वडा नं २ मा र आइतबार वडा नं १ र १२ मा स्वाब संकलन गरिने छ । निःशुल्क रुपमा स्वाब संकलन र परीक्षण गरिने भएकोले कोभिडका लक्षण देखिएका तथा संक्रमणको आशंका भएका व्यक्तिलाई पायक पर्ने ठाउँमा स्वाब दिन नगरपालिकाले आग्रह गरेको छ ।