बर्दिया । कर्णाली नदी व्यवस्थापन कार्यालय बर्दियाका तीनजना इन्जिनियर र एक सवारी चालक घुस रकम सहित पक्राउ परेका छन् ।

इन्जिनियरहरु कमल सिटौला, विश्‍वेश्‍वर प्रसाद शाह र हरी प्रसाद चौधरी तथा सवारी चालक टंक प्रसाद ओझालाई अख्तियारको टोलिले १५ लाख रुपैयाँ घुस रकम सहित पक्राउ गरेको हो । 

निर्माण योजना अन्तर्गत तारजाली भर्ने कामको विल रकम भुक्तानी गरे वापत सेवाग्राहीसँग १५ लाख रुपैयाँ घुस लिइसकेको अवस्थामा घुस रकम सहित बर्दिया जिल्ला गेरूवा गाउँपालिका वडा नं. १ बाट नियन्त्रणमा लिइएको आयोगका प्रवक्ता प्रदीपकुमार कोइरालाले बताए ।

उनीहरुले सेवाग्राहीसँग रकम माग गरिरहेको भन्ने सूचना एवं उजुरीको आधारमा अख्तियार दुरुपयोग अनुसन्धान आयोगको सम्पर्क कार्यालय, नेपालगञ्‍जबाट गएको टोलीले पक्राउ गरेको प्रवक्ता कोइरालाले बताए ।

उनीहरुमाथि थप अनुसन्धान भइरहेको पनि प्रवक्ता कोइरालाले जानकारी दिए ।