काठमाडौं । पेस्तोले देखाएर सुन लुटपाटको योजना बनाउँदै गरेको एक समूहलाई प्रहरीले पक्राउ गरेको छ ।

महानगरीय प्रहरी कार्यालय र अपराध महाशाखाबाट खटिएको प्रहरी टोलीले आइतबार साँझ गोंगबुको नेपाल तारा गेस्ट हाउसबाट त्यस्तो योजनामा संलग्न तीन जनालाई पक्रेको हो । 

पक्राउ पर्नेहरूमा झापा गरामनिका सविन खवास, नुवाकोटका लिखुका रामकुमार राई र प्रीतम राई छन् । 

‘पेस्तोले देखाएर सुन लुट्ने योजना बनाउँदै गरेको सूचनाका आधारमा उनीहरूलाई नियन्त्रणमा लिइएको हो’, महानगरीय अपराध महाशाखाका प्रमुख (एसएसपी) सहकुल थापाले भने, ‘सुन कहाँबाट आउँदै थियो भन्नेबारे अनुसन्धान भइरहेको छ ।’ 

प्रहरीले सो समूहको साथबाट ‘मेड इन इटाली’ लेखिएको एउटा पेस्तोल र पाँच राउन्ड गोली बरामद गरेको छ । 

रामकुमार राई र प्रीतम राई नुवाकोटमा ठेक्कापट्टाको काम गर्थे । ठेक्कापट्टाकै सिलसिलामा सविन खवाससँग उनीहरूको चिनजान भएको थियो । २०७३ फागुनमा नुवाकोटका मानदोर्जे तामाङलाई अपहरण तथा शरीर बन्धक बनाएको मुद्दामा पक्राउ परेका सविन २०७५ मा जेलबाट छुटेका थिए । 

जेलबाट छुटेपछि सविनले छुट्टै समूह बनाएर लुटपाटको योजना बनाएको प्रहरीको अनुसन्धानबाट थाहा भएको छ ।  

लुटपाटको योजना अनुसार सविनले आइतबार ‘मोटो रकम आउने काम छ, पेस्तोल लिएर आउनू’ भनेर प्रीतम र रामकुमारलाई नुवाकोटबाट काठमाडौं बोलाएका थिए । 

रामकुमारले हतियार लिएर आएपछि टोखामा भेट भएर सो समूह गोंगबुको गेस्ट हाउसमा पुगेका थिए । 

आपराधिक पृष्ठभूमिको सो समूहबारे थप अनुसन्धान भइरहेको एसएसपी थापाले सनराइज खबरलाई जानकारी दिए ।