काठमाडौं । काठमाडौं उपत्यकामा ‘सुइरो आतंक’ मच्चाएको भन्दै मंगलबार प्रहरीले एकजनालाई पक्रियो । उनी एक गायकका छोरा रहेछन् । तर, वयान लिन थालेपछि र पृष्ठभूमि बुझेपछि प्रहरी निरास भयो । किनभने सुइरो आतंक मच्चाउने उनी थिएनन् । 

उपत्यकामा सातजना महिलालाई अचानक सुइरोजस्तै वस्तुले घोपेर भाग्ने को हो ? प्रहरीको निष्कर्ष छ– त्यसरी आतंक फैलाउने एक जोडि युवा हुन् । उनीहरुले सुइरोले घोपेर गरेको आक्रमणका सिसी टिभी फुटेज हेरपछि प्रहरीको निष्कर्ष छ– यो जोडिमध्ये एकजनाले ६ ठाउँमा सुइरो आक्रमण गरेको छ । एक ठाउँमा मात्र दुईजना भएर आक्रमण गरेका छन् । 

सर्वसाधारणमा ‘सिरिन्ज आक्रमण’ नामले चर्चित यो घटनामा सिरिन्ज प्रयोग नभएको दाबी गरेका छन् डा. राजेश शाहले । शुक्रराज ट्रपिकल अस्पताल टेकुमा कार्यरत डा. राजेशले यो प्रकरणका पीडितहरुको स्वास्थ्य परीक्षण गरेका थिए । 

महानगरीय अपराध महाशाखाका प्रमुख (एसएसपी) सहकुल थापा भन्छन्–  ‘पीडितहरुलाई लागेको घाउमा सिरिन्जको भन्दा ठूलो डोब देखिएको छ । सिरिन्ज नै हो भन्ने यकिन छैन ।’ 

त्यसैले प्रहरीले यो अनौठो अपराधलाई ‘सिरिन्ज आक्रमण’ नभनेर ‘सुइरो आक्रमण’ भन्ने गरेको छ ।

सुइरो आक्रमणकारीका विशेषता

– महिलालाई मात्र आक्रमण गर्ने

– साँझपख आक्रमण गर्ने

– काठमाडौं सहरको निश्चित ठाउँमा मात्र आक्रमण गर्ने

– अचानक आक्रमण गरेर तत्काल भाग्ने

– धारिलो र चुच्चो वस्तुले घोच्ने

– मोटरसाइकलमा बसेर आक्रमण गर्ने

सुइरो आक्रमणको पहिलो घटना ०७५ चैतको अन्तिम साता भएको थियो । त्यसपछि ०७६ वैशाख १५, वैशाख २९, जेठ १८, जेठ २०, जेठ ३० र जेठ ३२ गते भएको थियो । 

अहिलेसम्म ‘सुइरो आक्रमण’बाट पीडित महिला मात्र छन् । महानगरीय अपराध महाशाखाका अनुसार अहिलेसम्म सात जना माथि सुइरो आक्रमण भएको छ । 

अपराध महाशाखा र काठमाडौं प्रहरीका लागि ‘सुइरो आक्रमण’ प्रकरण टाउको दुखाइको विषय बनेको छ । प्रहरीले यो विषयमा गहिरो अनुसन्धान गरिरहेको छ तर आक्रमणकारीको पहिचान खुल्न सकेको छैन् । 

प्रहरीसँग अपराधीका बारे कुनै सुराक छैन । पीडितहरु कसैले पनि आक्रमणकारीको हुलिया बताउन सकेका छैनन् । तर, प्रहरीसँग सडकमा राखिएको सिसिटिभी फुटेजमा कैद भएको अपराधीको हर्कत भने छ । तर, त्यसबाट न अपराधीको हुलिया पहिचान हुन्छ, न बाइकको नम्बर नै चिनिन्छ । 

भिडियोमा हेर्दा

घटना नम्बर १ :-

 प्रहरीको साथमा रहेको सिसी टिभी फुटेजमा डल्लु स्थित भित्री सडकमा एक किशोरी साँझपख कुकुर डुलाउँदै हिँडिरहेकी हुन्छिन् । 

एकसुरमा कुकुर डो¥याएर हिँडिरहेकी उनलाई विपरित दिशाबाट मोटरसाइकलमा आएका एक युवाले केही तीखो बस्तुले दाहिने पाखुरामा घोप्छन् । उनी तर्सन्छिन् । ती युवाले देब्रे हातले मोटरसाइकलको ह्याण्डिल समातेर दायाँ हातले युवतीको नांगो पाखुरामा घोपेको सिसीटिभी फुटेजमा देखिन्छ ।

आत्तिएकी ती किशोरीले आक्रमणकारीको मोटरसाइकल नम्बर टिप्न भ्याउँदिनन् । सिसीटिभीमा पनि मोटरसाइकलको नम्बर चिनिँदैन ।

घटना नम्बर २ :-

 ०७५ चैतको अन्तिम दिन थियो, पकनाजोल स्थित भित्री सड्कमा उभिइरहेकी एक युवतीको हिपमा एक अपरिचित युवाले तीखो बस्तुले घोप्छन् । युवतीले जिन्स पाइन्ट लगाएकी हुन्छिन्, कपडा छेडेर उनको शरीरमा तीखो बस्तुले घाउ लगाउँछ ।

०७६ जेठ २० मा तिनै युवतीलाई सोही ठाउँमा दोस्रोपटक तीखो बस्तुले घोपेर भागे । तर, त्यसरी तीखो बस्तुले आक्रमण गर्नेको हुलिया र बाइक नम्बर पीडीत युवतीले खुट्याउन सकिनन् । 

एकैजनामाथि दोस्रो पटक आक्रमण हुनुलाई प्रहरीले अनौठो मानेको छ । उनीमाथिको आक्रमणलाई ध्यानमा राखेर प्रहरीले अपराधी पत्ता लगाउने सूत्र खोजिरहेको छ । 

उनीबाहेक अरुमाथि दोहोराएर आक्रमण भएको छैन । 

चैतमै पहिलो आक्रमण

सुइरो आक्रमणको पहिलो घटना ०७५ चैतको अन्तिम साता भएको थियो । आक्रमणबाट पीडित महिलाले महानगरीय प्रहरी वृत स्वयम्भुलाई घटनाबारे जानकारी दिइन् । तर, स्वयम्भु प्रहरीले घटनालाई गम्भीरतापूर्वक लिएन । त्यसबेलै स्वयम्भु प्रहरी हर्कतमा आएको थियो भने अभियुक्तको मनोबल बढ्ने थिएन । त्यसबेलै आक्रमणकारीको पहिचान हुन सम्भव थियो । 

‘सिरिन्ज आक्रमण’को सिकार एक गर्भवतीसमेत भएकी छिन् । साँझपख टहलिन घर नजिकै सडकमा हिँडिरहेकी उनलाई कालो ज्याकेट लगाएर बाइकमा आएका पुरुषले घोपेर भागेका थिए । 

सुइरो आक्रमणबाट एक प्रहरी अधिकारीकी पत्नी समेत पीडित भएकी छिन् । 

दिदिबहिनी नै पीडित 

आक्रमणकारी उच्च मनोबलका अपराधी हुन् भन्ने पकनाजोलमा भएको आक्रमणबाट झल्कन्छ । त्यहाँ दिदीबहिनी हिँडिरहेका थिए । बहिनी केही पछाडि र दिदी केही अगाडि हिँडिरहेका थिए । आक्रमणकारी बाइकमा आउँछ, बहिनीलाई तीखो बस्तुले घोपेर अगाडि बढ्छ । बहिनी चिच्याउँछिन् । दिदी आत्तिँदै बहिनी भए ठाउँ पुग्छिन् । अलि पर पुगेको आक्रमणकारीले बाइक फर्काएर ल्याउँछ । दिदीलाई पनि तीखो बस्तुले घोपेर भाग्छ । 

यो घटना यति चाँडो भयो कि ती दिदीबहिनीले बाइकको नम्बर टिप्नसमेत भ्याएनन् । 

गत २३ जेठमा एउटा कारमा श्रीमान–श्रीमती डल्लु पुग्छन् । श्रीमान कार पार्किङ गर्न जान्छन्, श्रीमती पार्किङ बाहिर उभिएकी हुन्छिन् । एक युवा ती महिलालाई तीखो वस्तुले घोपेर भाग्छ । 

तीन बाइक 

सिरिन्ज आक्रमणकारी धेरैजसो एउटा बाइकमा एकजना मात्रै हिँड्ने गरेको प्रहरीको ठहर छ । 

‘एकपटक मात्र दुईजना हिँडेको खुलेको छ’ अनुसन्धानमा संलग्न एक प्रहरी अधिकृत भन्छन्, ‘प्रायजसो आक्रमणमा एकजना मात्रै संलग्न भएको सिसिटिभी फुटेजमा देखिन्छ ।’ 

आक्रमणमा तीनवटा बाइक प्रयोग भएको र दुईजना युवाहरु यसमा संलग्न रहेको प्रहरी स्रोतको भनाई छ । 

‘सिरिन्ज आक्रमण’मा २५–२६ बर्षका युवा संलग्न भएको आशंका महानगरीय अपराध महाशाखा र काठमाडौं प्रहरीको छ ।

त्यो ‘छुरी आक्रमण’

पञ्चायतकालको अन्तिम दिनतिर ०४६ सालमा काठमाडौं उपत्यकामा छुरी आतंक फैलिएको थियो । साँझपख अँध्यारोमा ठाउँठाउँमा वटुवामाथि छुरी आक्रमण भएको हल्ला फैलियो । त्यसबेलाको स्मरण गर्दै वरिष्ठ पत्रकार पद्मसिंह कार्की भन्छन्– ‘त्यसबेला अहिलेजस्तो इन्टरनेट आधारित सामाजिक सञ्जाल थिएन । हल्ला फैलन सजिलो हुँदैनथ्यो । तैपनि छुरी आक्रमणको हल्ला यसरी फैलियो कि साँझपख नै काठमाडौं सुनसान हुन थालेको थियो ।’

छुरी आक्रमण भएको पुष्टि चाहिँ भएन । सिर्फ हल्लाका भरमा आतंक फैलियो । कतिपयले त्यसबेला पञ्चायती व्यवस्था विरोधीहरुले फैलाएको हल्ला पनि भने । 

अहिले त्यसबेलाकै शैलीमा ‘सिरिन्ज आक्रमण’को हल्ला फैलिएको छ । त्यसबेला बिना उद्देश्य आक्रमण गरिन्छ भन्दै हल्ला फैलिएको थियो । अहिलेको आक्रमण पनि ठोस कुनै कारणबिना भएको आशंका गरिएको छ । ‘आक्रमणमा यदि कुनै कारण छ भने अपराधीको मानसिक कारण हुनसक्छ, यो कुनै उद्देश्य राखेर गरिएको आक्रमण जस्तो देखिँदैन’– एक प्रहरी अधिकारीले दाबी गरे ।

तर, गत ११ दिनयता सुइरो आक्रमण भएको छैन ।