शटर फुटाएर ९० लाखको सुन चोरी, तीन जना पक्राउ
ललितपुर । पुल्चोकस्थित शाक्या ज्यासको शटर २१ माघको बिहान फुटाइएको थियो ।
शटर फुटाएर करिब ९० लाख रुपैयाँ बराबरका सुन र चाँदीका गहना चोरिएको थियो । मिनिटाटा लिएर सात जनाको समूहमा अाएका थिए चोर ।
सुन पसलको सेफ समेत चोरी गरेेेका सो समूहका तीन जनालाई प्रहरीले पक्राउ गरेको छ ।
चोरीमा संलग्न तीनजना भारतीय नागरिकलाई पक्राउ गरिएको महानगरीय प्रहरी परिसर ललितपुरका सह–प्रवक्ता (डीएसपी) सन्तोष तामाङले जानकारी दिए ।
पक्राउ पर्नेमा सुरज पोद्धार, चन्दन पोद्धार र रविन पोद्धार रहेका छन् । चोरीमा संलग्न अन्य चार जना फरार छन् ।
सिसिटिभी फुटेज र अन्य प्राविधिक पक्षको अनुसन्धानपछि उनीहरुलाई प्रहरीले पक्रेको हो । सुन चोरीमा संलग्न महिलासहितको सो समूह भारतबाट चोर्नकै लागि नेपाल आएको प्रहरी अनुसन्धानबाट खुलेको छ ।
कवाडी सामान संकलन गर्ने बहानामा दिनभर रेकी गरेर राति तथा विहानपख उनीहरुले चोरी गर्ने गरेका थिए । उनीहरुलाई महानगरीय प्रहरी प्रभाग पुल्चोक र अपराध महाशाखाको संयुक्त टोलीले सतुंगलबाट नियन्त्रणमा लिएको हो ।
शाक्य ज्यासबाट चोरेको सेफ नैकापस्थित विष्णुमतीको किनारमा फालेको अवस्थामा फेला परेको छ । पक्राउ परेकाहरुको साथबाट चोरी गरेको सुन बरामद गरिएको डीएसपी तामाङले बताए ।
प्रतिकृया दिनुहोस