काठमाडौं । भिक्ट्री डे परेडमा चीनले विश्वलाई नै चकित पार्ने हतियारहरु प्रदर्शन गरेको छ । 

जापापानी आक्रामकता विरुद्ध चिनियाँ जनताको प्रतिरोध युद्ध र विश्व फासिस्ट विरोधी युद्धमा विजयको ८० औं वार्षिकोत्सव मनाउन बुधबार चीनको राजधानी बेइजिङमा आयोजित समारोहमा हावाबाट विभिन्न अत्याधुनिक हतियारहरु चीनले पहिलो पटक सार्वजनिक गरेको हो । 

चिनियाँ मिडिया ग्लोबल टाइम्सका अनुसार हावाबाट हान्न सकिने लामो दूरीको आणविक क्षेप्यास्त्र सहित १० हजार किलोमिटर टाढासम्म हान्न सक्ने क्षेप्यास्त्र पनि सार्वजनिक गरिएको छ । 

चिनियाँ सेनाले जमिन, समुद्र र वायुमा आधारित एकीकृत रणनीतिक आणविक त्रिकोणमा आधारित हतियारको एकीकृत सेट नै प्रदर्शन गरेको छ । चीनले वर्षेनी विभिन्न खालको सैन्य परेड गरे पनि पहिलो पटक परेडमा वायु–आधारित रणनीतिक आणविक हतियार प्रदर्शन गरेको हो । सैन्य मामिला विज्ञ शाओ योङलिङले ग्लोबल टाइम्सलाई बताए अनुसार हवाई–प्रक्षेपित रणनीतिक क्षेप्यास्त्रको सञ्चालनले चीनलाई आणविक आक्रमणको लागि थप विकल्प प्रदान गर्दछ, जसले चीनको आणविक प्रतिरोध र प्रतिआक्रमण क्षमतालाई अझ भरपर्दो र विश्वसनीय बनाउने छ ।

‘हवाई–प्रक्षेपित रणनीतिक क्षेप्यास्त्रको आधिकारिक सुरुवातको अर्थ चीन आणविक त्रिकोण भएको विश्वका केही देशहरू मध्ये एक बनेको छ,’ सैन्य विज्ञ झाङ जुन्सेले भनेका छन् ।

सामान्यतया, वायु–आधारित रणनीतिक आणविक शक्तिहरूले रणनीतिक बमवर्षकहरूलाई स्ट्राइक प्लेटफर्मको रूपमा प्रयोग गर्छन्, जसमा बलियो गतिशीलता र जोगिने क्षमता हुन्छ । चीनले सार्वजनिक गरेको रणनीतिक बमवर्षकहरू कुनै पनि समयमा उडान भर्न सक्छन्, र वायु–आधारित रणनीतिक क्षेप्यास्त्र प्रक्षेपणको स्थान र समय भविष्यवाणी गर्न गाह्रो छ । झाङका अनुसार यसले विपक्षीहरूलाई पत्ता लगाउन कठिन बनाउँछ ।

भिक्ट्रि डे परेडमा सार्वजनिक गरिएको जेएल–३ ले पनडुब्बीबाट प्रहार गरिने ब्यालिस्टिक क्षेप्यास्त्रहरूको स्ट्राइक रेन्जलाई अझ विस्तार गर्ने बताइएको छ । चीन अब अन्तरमहादेशीय क्षेप्यास्त्रको युगमा प्रवेश गरेको पनि सैन्य विज्ञहरुले बताएका छन् । 

‘लामो दूरीदेखि अन्तरमहादेशीयसम्म, यसको अर्थ जेएल –३ को दायरा लगभग १० हजार किलोमिटर पुग्न सक्छ, र यसको अर्थ यो पनि हो कि यसले विश्वका सबै देशहरूलाई समेट्न सक्छ जसले चीनलाई आणविक खतरा निम्त्याउन सक्छ,“ झाङले भने । विस्तारित दायराको अर्थ यो पनि हो कि चीनको रणनीतिक आणविक पनडुब्बीहरूले आणविक प्रत्याक्रमण गर्न तथाकथित दोस्रो टापु श्रृंखला वा प्रशान्त महासागरको गहिराइभन्दा बाहिर जान आवश्यक छैन, झाङले थपे । 

नयाँ पनडुब्बी–प्रक्षेपित अन्तरमहादेशीय क्षेप्यास्त्रले चीनको आणविक प्रत्याक्रमण क्षमतालाई धेरै नै बढाउने बताइएको छ । झाङले ग्लोबल टाइम्सलाई भनेका छन्, जेएल–३ को कार्यान्वयनले चीनमाथि केही आणविक शक्तिहरूले लगाएको आणविक खतरा, ब्ल्याकमेल र नाकाबन्दीलाई प्रभावकारी रूपमा रोक्न सक्छ ।