काठमाडाैं । घरेलु टाेली नेपाल साफ माहिला च्याम्पियनसिप फुटबलको फाइनलमा प्रवेश गरेको छ । 

काठमाडाैंकाे त्रिपुरेश्वरस्थित दशरथ रंगशालामा आइतबार भएको दाेस्राे सेमिफाइनल खेलमा भारतलाई पेनाल्टी सुटआउटमा ४-२ ले पराजित गर्दै नेपाल फाइनल पुगेको हो ।

निर्धारित समयकाे खेल १-१ को बराबरीमा सकिएपछि खेल पेनाल्टी सुटआउटमा गएकाे थियाे । पेनाल्टी सुटआउटमा नेपालले ४ गोल गर्दा भारतले २ गोल मात्रै गरेको हो ।

नेपालले अब उपाधिका लागि बंगलादेशसँग खेल्नेछ । आजै भएकाे पहिलाे सेमिफाइनल खेलमा भुटानलाई हराउँदै बंगलादेश फाइनलमा पुगेकाे थियाे ।

विवादका कारण आज १७८ मिनेटसम्म खेल लम्बिएको थियो । भारतले खेलको ७१औं मिनेटमा गोल गर्दै अग्रता लिएको थियो । त्यसलगत्तै नेपालले पनि गोल गरेको थियो । नेपालकी प्रीति राईले गरेको गोललाई रेफ्रिले मान्यता नदिएपछि खेलमा तनाव सुरु भएकाे थियाे । आक्रोशित दर्शकले बोतल प्रहार गर्दा खेल रोकिएको थियो । रोकिएको १ घन्टापछि खेल सुरु भएको थियो । खेल सुरु भएको एक मिनेट भित्रै नेपालीकी सावित्रा भण्डारी साम्बाले बराबरी गोल फर्काएकी थिइन् ।

त्यसअघि दोस्रो हाफको सुरुमै नेपालकी रेखा पौडेलले रातो कार्ड पाएकी थिइन् । दोहोरो पहेँलो कार्डपछि रेखा रातो कार्ड पाउँदै मैदानबाट बाहिरिइन् । रेफ्रीले रेखालाई रातो कार्ड देखाएपछि स्थिति तनावग्रस्त बनेको थियो । सुरक्षा चुनौती बढेकाे भन्दै खेल करिब १५ मिनेट खेल रोकिएको थियो ।