काठमाडौं । स्टार लेगस्पीनर सन्दीप लामिछानेको टोली टोरन्टो नेशनल्सले आज ब्राम्पटन उल्भसविरुद्ध चौथो खेल खेल्दैछ । पहिलो तीनखेलमा एउटा जितेपनी दुई हारको कारण नेशनल्सलाई आजको खेल जित्नैपर्ने दबाव रहेको छ । उल्भसले भने अहिलेसम्म खेलेको तीनवटै खेल जितिसकेको छ । 

राष्ट्रिय टोलीको लागि टी–२० विश्वकपको एसियाली छनोट खेल्न सिंगापुर रहेका कारण सन्दीप टोरन्टोको लागि उपलब्ध थिएनन् । यसअघिको खेलको लागि उनी उपलब्ध भएपनी लामो यात्राबाट आएका सन्दीपलाई खेलाउने जोखिम छनोटकर्ताले लिन सकेनन् ।

आजको खेलमा भने सन्दीप खेल्ने पक्का रहेको छ । पछिल्लो समय विश्वस्तरीय लिगहरु खेलेर खारिएका सन्दीपलाई टोरन्टोले ६० हजार डलर मुल्यमा खरिद गरेको थियो । 

राउन्ड रोबिन लिग स्वरुपमा खेलिएको यस खेलको बाँकी तीन खेल जित्दै प्लेअफमा स्थान बनाउने दबाव रहेको कारणपनि टोरन्टोले अबका खेलहरुका लागि सबै शक्ति लगाउने पक्का रहेको छ । 

खेल नेपाली समयअनुसार राती १०ः१५ मा सुरु हुने तालिका रहेको छ ।