काठमाडौं । काठमाडौंको डल्लु, पकनाजोल र ठहिटी क्षेत्रमा सुई आतंक मच्चाउने रामेछापका सन्तोष कार्कीलाई प्रहरीले फेरी पक्रेको छ । रामेछापको खाँडादेवी घर भएका सन्तोषलाई प्रहरीले पहिलोपटक १२ असारमा पक्रेर मुद्धा चलाएको थियो । 

जिल्ला अदालत काठमाडौंले ३ लाख धरौटीमा छाड्न आदेश दिएपछि उनलाई पुनः पक्राउ गरिएको महानगरीय प्रहरी परिसर काठमाडौंका प्रवक्ता (डिएसपी) होविन्द्र बोगटीले जानकारी दिए । ‘महानगरीय प्रहरी वृत लैनचौरमा सन्तोषको नाममा अर्को मुद्धा थियो’ डिएसपी बोगटीले भने, ‘त्यसैले अदालतबाट छुटेपछी अर्को मुद्धाको लागी नियन्त्रणमा लिइएको हो ।’ 

महिलामाथि काँटी घोपेर अपमानजनक व्यावहार मुद्धामा धरौटीमा छुटेका कार्कीमाथि अभद्र ब्यवहारमा फेरी अनुसन्धान भईरहेको डिएसपी बोगटीले जानकारी दिए । कार्कीले सोह्रखुट्टेकी एक महिलालाई दुई पटक सुईरोले घोपेका थिए ।