काठमाडौं । मलेसियामा जारी एसीसी यु–१९ पूर्वी क्षेत्रीय क्रिकेट प्रतियोगितामा नेपालले विजयी शुरुवात गरेको छ । बुधबार भएको खेलमा चीनलाई १० विकेटले पराजित गर्दै नेपालले प्रतियोगितामा विजयी सुरुवात गरेको हो ।

चीनले दिएको ५४ रनको झिनो लक्ष्य नेपालले चार ओभर पाँच  बलमा पुरा गर्यो । नेपालको जितमा प्रारम्भिक ब्याट्सम्यान पवन सर्राफले विस्फोटक ब्याटिङ गर्दै २१ बलमा ४६ रन बनाए ।

त्यस्तै रित गौतमले १० रन बनाए ।

त्यसअघि किनरारा ओभल मैदानमा भएको खेलमा टस हारेर  ब्याटिङको निम्तो पाएको चीनले २३ ओभर एक बलमा सबै विकेट गुमाएर ५३ रन मात्र बनाएको थियो । 

चीनका लागि गुहाओ गाओ र लिआङ्ग चेनले सर्वाधक १३–१३ रन बनाए । अन्य ब्याट्सम्यानले दोहोरो अंकमा रन बनाउन सकेनन् ।

नेपालका लागि सागर ढकालले ६ विकेट लिए । नौ ओभर एक बल बलिङ गरेका उनले तीन ओभर मेडन राख्दै १९ रन दिएर ६ विकेट लिएका हुन् । त्यस्तै तिलकराज भण्डारीले तीन र कमलसिंह ऐरीले एक विकेट लिए ।

समूह ए मा नेपाल सँगै चीन र सिङ्गापुर छन् । नेपालले आफ्नो दोस्रो तथा समूह चरणको अन्तिम खेल असार २० गते सिङ्गापुरसँग खेल्नेछ ।