काठमाडौं । सरकारी छाप, लेटरप्याड र दस्तखत कीर्ते गरी सरकारसँगै एक अर्ब आठ करोड क्षतिपूर्ति भराउन खोज्ने दुई जना पक्राउ परेका छन् ।

प्रहरीले काभ्रेको धुलीखेल बस्ने बारा निजगढकी ३३ वर्षीय लक्ष्मी अधिकारी र उनका श्रीमान ३८ वर्षीय राजनकुमार थापालाई पक्राउ गरेको हो ।

सिंहदरबारको दक्षिण गेट नजिकबाट उनीहरुलाई महानगरीय प्रहरी वृत्त सिंहदरबारबाट खटिएको प्रहरी टोलीले पक्राउ गरेको हो । 

प्रहरीले उनीहरुको साथबाट गृह मन्त्रालयको नक्कली लेटर प्याडमा लक्ष्मी अधिकारीको बुवाको मृत्यु नेपाल सरकारको कारणले भएको भनी प्रमाणित गरिएको कागज समेत बरामद गरेको छ । पत्रमा गृह मन्त्रालयका प्रवक्ता रामकृष्ण सुबेदीको कीर्ते हस्ताक्षर छ ।

सो कागजमा क्षतिपूर्ति स्वरुप ९५ करोड दिने निर्णय भएको र थप आठ करोड ७६ लाख गरी जम्मा एक अर्ब आठ करोड ७६ लाख दिने उल्लेख छ ।

त्यसैगरी प्रहरीले उनीहरुको साथबाट १३ थान बैंकको चेक, विभिन्न व्यक्तिको राहदानी र नगद ४२ हजार दुई सय दश रुपैयाँ समेत बरामद गरेको छ ।

उनीहरुको बारेमा अनुसन्धान थालिएको प्रहरीले जनाएको छ ।