वाशिङटन डीसी   । अमेरिकी प्रतिनिधिसभाले राष्ट्रपति डोनाल्ड ट्रम्पलाई इरानविरुद्ध थप सैन्य कारबाही अघि बढाउन रोक लगाउने उद्देश्यसहित एक प्रस्ताव पारित गरेको छ। उक्त प्रस्ताव २१५ विरुद्ध २०८ मतले पारित भएको हो।

यो मतदानलाई ट्रम्प प्रशासनको इरान नीतिप्रति अमेरिकी राजनीतिक वृत्तमै बढ्दो असन्तुष्टिको संकेतका रूपमा हेरिएको छ। विशेषगरी रिपब्लिकन पार्टीभित्रकै केही सांसदहरूले पनि डेमोक्रेटहरूको पक्षमा मतदान गरेपछि विषय थप चर्चामा आएको छ।

मतदानमा रिपब्लिकन सांसदहरू थोमस मेसी, ब्रायन फिट्जप्याट्रिक, टम ब्यारेट र वारेन डेभिडसनले डेमोक्रेटहरूको साथ दिँदै प्रस्तावको समर्थन गरेका थिए। मेन राज्यका डेमोक्रेट सांसद जारेड गोल्डेन पनि प्रस्तावको पक्षमा उभिए।

रिपब्लिकन सांसद टम ब्यारेटले युद्ध घोषणा गर्ने अधिकार अमेरिकी कांग्रेससँग मात्र रहेको भन्दै त्यस अधिकारको संरक्षण आवश्यक भएको बताए। उनले राजनीतिक दबाबभन्दा पनि आफ्नो विवेकअनुसार मतदान गरेको प्रतिक्रिया दिएका छन्।

अब यो प्रस्ताव रिपब्लिकन बहुमत रहेको अमेरिकी सिनेटमा जानेछ। यदि त्यहाँ पनि पारित भयो भने राष्ट्रपति ट्रम्पले यसलाई भिटो गर्न सक्नेछन्। तर भिटो उल्ट्याउन दुवै सदनमा दुई-तिहाइ बहुमत आवश्यक पर्छ।

प्रतिनिधिसभाको विदेश मामिला समितिका वरिष्ठ डेमोक्रेट सदस्य ग्रेगरी मिक्सले यस निर्णयलाई ट्रम्पको इरान नीतिविरुद्ध द्विदलीय चेतावनी भएको टिप्पणी गरेका छन्। उनका अनुसार युद्धले अपेक्षित परिणाम दिन नसकेको र ऊर्जा मूल्य वृद्धि तथा कूटनीतिक चुनौती बढाएको छ।

यसैबीच, पछिल्ला महिनाहरूमा अमेरिका र इरानबीच तनाव र सैन्य गतिविधि निरन्तर बढिरहेको बताइएको छ। दुवै पक्षबीच आक्रमण–प्रत्याक्रमणका घटना भएका छन् भने खाडी क्षेत्रमा सुरक्षा अवस्था संवेदनशील बनेको छ।

यता राष्ट्रपति ट्रम्पले भने वार्ता सकारात्मक दिशामा अघि बढिरहेको दाबी गर्दै सम्झौता निकट रहेको बताएका छन्। उनले अमेरिका र इरानबीच सहमतिको सम्भावना बलियो भएको उल्लेख गर्दै संवाद जारी रहेको बताएका छन्।