काठमाडौं । जर्मनीकी चान्सलर एन्जेल मर्केलले आफ्नो देशका ६० देखि ७० प्रतिशत जनता आगामी दिनमा कोभिड–१९ बाट संक्रमित हुनसक्ने बताएकी छिन् । 

राजधानी बर्लिनमा आयोजित एक पत्रकार सम्मेलनमा उनले सो कुरा बताएकी हुन् । 

उनले जर्मनीका मानिसमा रोग प्रतिरोधात्मक क्षमता थोरै भएको पनि बताइन् । रोयटर्स समाचार एजेन्सीका अनुसार अहिलेसम्म जर्मनीमा १२९६ जनामा कोभिड–१९ देखिएको छ । 

चान्सलर मर्केलले भेटघाटमा हात नमिलाउन पनि अपिल गरिन् । 

यस अघि वेलायतको एक सञ्चार माध्यमले वेलायती सरकारको गोप्य रिपोर्ट सार्वजनिक गरेको थियो । जसमा वेलायतका ८० प्रतिशत मानिसलाई कोभिड–१९ ले छुने आकलन गरिएको थियो । 

वेलायतमा अहिलेसम्म ४५६ जनालाई कोभिड–१९ देखिएको छ ।

युरोपको इटालीमा भने १० हजारभन्दा धेरैलाई संक्रमण देखिएको छ । पूरै इटाली अहिले लकडाउनका हालतमा रहेको छ ।